Լուրեր

Հայ առաքելական Սուրբ եկեղեցի

Արարատյան հայրապետական թեմ

Մայր Աթոռում որևէ մտավախություն չկա հանրահավաքին հնչեցված կոռուպցիոն մեղադրանքների առնչությամբ

Մայր Աթոռում որևէ մտավախություն  չունեն  Սուրբ Գայանե Վանքի նախկին վանահայր Կորյուն աբեղա Առաքելյանի ՝ Գանձապետարանի թալանի մասին հայտարարությունների առնչությամբ:

«Այդ ամենը կեղծ է, մենք որևէ մտավախություն չունենք»,- Tert.am-ին ասաց Մայր Աթոռի տեղեկատվական համակարգի տնօրեն տեր Վահրամ քահանա Մելիքյանը:  
Հարցին, թե այդ դեպքում զրպարտության համար չեն պատրաստվում դիմել դատարան, Տեր Վահրամը պատասխանեց.

«Մեզ անընդհատ զրպարտում են: Եթե այդպես վարվենք,  դա նշանակում է, որ մենք դատարաններից պետք է դուրս չգանք»,-ասաց Տեր Վահրամը, ապա նշեց. «Նորին Սրբության հետևողականության շնորհիվ կատարվեց լիարժեք ցանկագրում-գույքագրում Սուրբ Էջմիածնում պահվող բոլոր սրբությունների և թանգրանային արժեքների»:

Հիշեցնենեք, որ հունիսի 30 –ին՝ Կաթողիկոսի հրաժարականի պահանջով Էջմիածնում տեղի ունենացած  հանրահավաքին այդ պահանջները բարձրաձայնողներից Կորյուն աբեղա Առաքելյանը հայտարարեց, թե Մայր աթոռի գանձատունը թալանված է:

Ըստ այդմ՝ եկեղեցականների հագուստի վրայի թանկարժեք ու կիսաթանկարժեք քարերը փոխարինված են այլ քարերով, նաև՝ ապակիներով:

Իսկ սրբերի մասունքներն անփոփող մասնատուփերն էլ փոխարինվել են նորերով: Ավելին՝ Կորյուն աբեղան պահանջեց, որ Ազգային անվտանգության ծառայությունը գնա իր հայտարարության հետքերով: Նշենք, որ երեկ Մայր աթոռ Սուրբ Էջմիածնի թանգարանների տնօրինությունը հայտարարություն էր տարածել, որում նշվում էր, թե Կորյուն աբեղան մոլորեցնում է:

Ներկայացնում ենք հայտարարությունն ամբողջությամբ.

«Նորահայտ աղանդավորական շարժման խթանիչներից Կորյուն աբեղան երեկ` Վաղարշապատ քաղաքում կատարեց իբր թե բացահայտում, ըստ որի` Մայր Աթոռ Սուրբ Էջմիածնի սրբություններն ու մասունքները վաճառվում ու կեղծվում են Ամենայն Հայոց Կաթողիկոսի, նրա լծակներից ու համախոհների կողմից:

Հաշվի առնելով այն հանգամանքը, որ այդ սուտը երևաց նաև տեղեկատվական դաշտում` հարկ համարեցինք հանդորրամտություն Սբ Էջմիածնի Թանգարանների բազմաթիվ այցելուների և մեր Սուրբ Եկեղեցու հավատացյալների հանդես գալ սույն հայտարարությամբ: Խստորեն դատապարտելով կարգազանց այդ սքեմավորին` հայտնում ենք, որ վերոնշյալ անձը և այդ շարժման ղեկավարներն առհասարակ հերթական սուտ ու անհիմն տեղեկությունն են տարածում իրենց հետևորդների շրջանակներում` մոլորեցնելով նաև բարեմիտ հավատացյալներին:

Մայր Աթոռ Սուրբ Էջմիածնի բոլոր սրբություններն ու մասունքները, ինչպես նաև թանգարանային առարկաները, ոչ միայն անձեռնմխելիորեն և ապահով պահվում ու ցուցադրվում են Մայր Աթոռի թանգարաններում, այլև Ն.Ս.Օ.Տ.Տ. Գարեգին Բ. Ամենայն Հայոց Հայրապետի գահակալության տարիներին հարյուրավոր պատմամշակութային ու գեղարվեստական առարկաներով (մասունքներ, հինավուրց խաչքարեր, ձեռագրեր, հնատիպ գրքեր, սրբանկարներ, աստվածպաշտական ու նվիրական առարկաներ, եկեղեցական զգեստներ, գործվածքներ, գեղանկարներ, հին մետաղադրամներ ու թղթադրամներ, հուշադրամներ) համալրվել են:

Հատկապես հիշատակարժան են երանաշնորհ Հովհաննես-Պողոս Բ. Հռոմի Պապի կողմից հանձնված Սբ Գրիգոր Լուսավորիչ Հայրապետի մասունքները, ինչպես նաև` Սանկտ-Պետերբուրգի Պետական Էրմիտաժի կողմից հռչակավոր Սկևռայի մասունքարանի վերադարձը Հայաստանյայց Սուրբ Եկեղեցուն: Շնորհիվ Հայոց Հայրապետի բարեխնամ տնօրինության վերստին կյանքի կոչվեց սրբոց տոների և եկեղեցիների ու վանքերի ուխտագնացությունների առիթներով` Մայր Աթոռի մասանց պահարանից սրբոց մասունքների դուրս բերումը և Հայոց երկրի զանազան սրբավայրեր հանդիսավորապես տեղափոխումն ի մխիթարություն և ի զորացումն մեր հավատացյալների: Ինչպես պատմական անցյալում, այսօր ևս և միշտ Մայր Աթոռ Սուրբ Էջմիածինը գոհացում է տալիս իր աշխարհասփյուռ թեմերի ու ծխական համայնքների հոգևոր կարիքներին:

Ընդառաջ այդ ամենին, Հայոց Հայրապետի օրհնությամբ և մեկենասությամբ բարեպաշտ հայորդիների, պատրաստվել են նաև նոր մասունքարաններ, որոնց մեջ զետեղվել են Սուրբ Էջմիածնում պահվող տարբեր սուրբ մասունքներից մասեր ու նվիրաբերվել ինչպես Հայաստանի, այնպես էլ Սփյուռքի որոշ եկեղեցիների (զոր օրինակ` Աշոտ Բ. Երկաթ արքայի Կենաց փայտի մասունքով խաչի կրկնօրինակի ընծայումը Հայոց բանակին, Սբ Վարդան Զորավարի քարի մասունքով ճաճանչախաչի ընծայումն ԱՄՆ Հայոց Արևելյան թեմին, Կենաց Փայտի մասունքով խաչի ընծայումը Ռուսաստանի և Նոր Նախիջևանի Հայոց թեմին, Սբ Հովհաննես Մկրտչի մասունքով խաչի ընծայումը Կոտայքի թեմին և այլն):

Հայոց հոգևոր կյանքի նորոգությանն ու զորեղացմանն ուղղված բոլոր ընծայաբերությունները և Մայր Աթոռի Թանգարանների գանձերի համալրումներն իրենց ժամանակին հատուկ կերպով ներկայացվել են Թանգարանների հաղորդագրություններով և լուսաբանվել Մայր Աթոռի Տեղեկատվական համակարգի հրապարակումներով ու «Շողակաթ» հեռուստաընկերության տեսանյութերով: Հորդորում ենք, որ հետ այսու ազգային-եկեղեցական դարավոր սրբություններն ու արժեքները չդարձվեն ստապատիր ու նվաստ խոսքավաճառության նյութ, քանզի դրանց Սուրբ Զորությունը կսատակի նման հանդգնություն ունեցող խաչագողերին»:

Դիտվել է 300 անգամ:
« Վերադառնալ ցանկ

Արխիվ

Թեմական կյանք