Լուրեր

Հայ առաքելական Սուրբ եկեղեցի

Արարատյան հայրապետական թեմ

Խոսել գործերով

Հուլիսի 19-ին Ս. Երրորդություն եկեղեցու համայնքը, հոգևոր հովիվ Տեր Պարթև քահանա Մուրադյանի գլխավորությամբ, ուխտագնացության մեկնեց Շիրակի մարզի սրբավայրեր:

Ուխտագնացության նպատակը միայն սրբավայրեր այցելելն ու աղոթական ուղի անցնելը չէր: Երկար ժամանակ է, ինչ համայնքի անդամները փորձում են կազմակերպել և իրականացնել բարեգործական ծրագիր, որն էլ ավելի կիմաստավորեր իրենց ուխտագնացությունները:

Բարեգործությունը քրիստոնեական կենցաղավարության ու բարեպաշտության հիմնական և անհրաժեշտ դրսևորումներից է: Այն «Ինչպես որ մեռած է մարմինը առանց հոգու, այնպես էլ մեռած է հավատը առանց գործերի» (Հակոբոս 2:26) պատգամի իրական արտահայտումն է: Աստվածաշնչյան այս տողերի իրագործման ճանապարհն են բռնել Ս. Երրորդություն եկեղեցու հավաացյալ ուխտավորները:

Ծրագրի առաջին կանգառը եղավ Հոռոմ գյուղում: Համայնքի կողմից հավաքված նվերները, գրենական պիտույքները և այլ իրեր բաժանվեցին գյուղի նախակրթարանի սաներին:

Այնուհետև ուխտավորները այցելեցին Ս. Հռիփսիմե խոնարհված եկեղեցի, որտեղ աղոթք բարձրացրին առ Աստված եկեղեցու պայծառության և նորոգության համար:

Մարմաշեն գյուղի Վահրամավանքում մասնակցեցին Խաղաղական ժամերգության: Ապա Գյումրու Յոթ Վերք եկեղեցում մասնակցեցին Երեկոյան ժամերգությանը:

Սրանով, սակայն, չավարտվեց ուխտավորների առաքելությունը: Նրանք այցելեցին նաև Հոռոմ գյուղում բնակվող ապրիլյան պատերազմում զոհված Տիգրան Պողոսյանի ընտանիքին, որտեղ եկեղեցու Տիկնանց միության անդամ տիկին Հռիփսիմեի բարերարությամբ դրամական օգնություն հանձնվեց զոհվածի ծնողներին:

«Օգուտն ի՞նչ է, եթե մեկն ասի, թե հավատ ունի, սակայն հավատն արտահայտող գործեր չունենա: Միթե հավատը նրան կկարողանա փրկել» (Հակոբոս 2:14): Մեր Տեր և Փրկիչ Հիսուս Քրիստոս Իր քարոզության ողջ ընթացքում սովորեցրեց մեզ գործուն հավատք և սեր ունենալ Աստծո և մարդկանց նկատմամբ:

Քրիստոնյայի կյանքը չպետք է խոսք լինի, այլ գործ: Քրիստոնյան պետք է խոսի իր գործերով, այլապես անարժեք և սին կլինեն նրա խոսքերը:

Այս ուխտագնացությունը եղավ առաջինը, բայց ոչ վերջինը ուխտավորների համար: Բարեգերծ ուխտավորները դեռ երկար ուխտի ճանապարհ պետք է անցնեն:

Հասմիկ Թամամյան

Բարեգործ ուխտավորներ Բարեգործ ուխտավորներ Բարեգործ ուխտավորներ Բարեգործ ուխտավորներ
Դիտվել է 843 անգամ:
« Վերադառնալ ցանկ

Արխիվ

Թեմական կյանք