Լուրեր

Հայ առաքելական Սուրբ եկեղեցի

Արարատյան հայրապետական թեմ

Օրհնություն ծննդատանը՝ Ս. Աստվածածնի ծննդյան օրվա առիթով

Ծննդատան դիմաց անհանգիստ այս ու այն կողմ քայլող տղամարդու դեմքին ժպիտ եկավ միայն այն ժամանակ, երբ լսվեցին ծննդատան բակում գտնվող մատուռի զանգերը: Արդեն մի քանի տարի է, ինչ «Քանաքեռ-Զեյթուն» ծննդատանը երեխայի ծնունդն ավետում են հենց այդ զանգերը:


Սեպտեմբերի 8-ին մինչ ապագա հայրիկները սպասում էին ծննդատան բակում, ԱՀԹ երիտասարդները երիտասարդաց միությունների պատասխանատու Տեր Պետրոս ավագ քահանա Մալյանի գլխավորությամբ այցելեցին ծննդատան նորածիններին ու նրանց մայրիկներին:


ԱՀԹ առաջնորդական փոխանորդ Գերաշնորհ Տ. Նավասարդ արքեպիսկոպոս Կճոյանի օրհնությամբ թեմի երիտասարդաց միությունների անդամները ծննդատներ են այցելում Ս. Տիրամորը նվիրված բոլոր տոներին՝ շնորհավորելու և Ս. Մկրտության խորհուրդը փոխանցելու նորածիններին ու նրանց ընտանիքներին: Իսկ այսօր շնորհավորելու ևս մեկ առիթ կար, քանի որ սեպտեմբերի 8-ին Հայ Առաքելական եկեղեցին նշում է Ս. Մարիամ Աստվածածնի ծննդյան տոնը:


Տեր հայրն օրհնեց բոլոր մայրերին ու նորածիններին, շնորհավորեց Ս. Տիրամոր ծննդյան տոնի կապակցությամբ և Արարատյան Հայրապետական թեմի կողմից բոլոր երեխաներին նվիրեց օրհնված խաչեր, սրբիչներ, նարոտ ու ձեռագործ գուլպաներ:


Օրվա ավարտին երիտասարդները այցելեցին նաև ծննդատան բակում գտնվող՝ Ս. Աստվածածնի անունը կրող մատուռ, որտեղ մոմ վառեցին և Աստվածամոր բարեխոսությունը խնդրեցին բոլոր մայրերի, նորածիների և իրենց ընտանիքների համար:


Հասմիկ Թամամյան

Այց ծննդատուն Այց ծննդատուն Այց ծննդատուն Այց ծննդատուն Այց ծննդատուն
Դիտվել է 2422 անգամ:
« Վերադառնալ ցանկ

Արխիվ

Թեմական կյանք