Քրիստոնեական, ազգային արժեքներ. ինչո՞ւ են դրանք կարևոր հայ քրիստոնյայի  կյանքում ու ինչպե՞ս պայքարել դրանք պահպանելու համար: Մեր զրուցակցի՝ Քանաքեռի Սուրբ Հակոբ եկեղեցու հոգևոր հովիվ Տեր Շմավոն քահանա Ղևոնդյանի կարծիքով՝ այդ պայքարն անհնար է առանց Հայ Առաքելական Եկեղեցու: Եկեղեցին ոչ միայն Աստծո խոսքը տարածողն է, այլև լծված է քրիստոնեական և ազգային արժեքների պահպանման, փոխանցման գործին:

 

Արժեքները և քրիստոնեությունը

 

-Քրիստոնեությունը դարձավ արժեքների ձևավորման կիզակետը` ընտանիքի, մարդկային հարաբերությունների, մեր աստվածահաճո ընթացքի: Մենք՝ հայերս, այդ արժեքներով ձևավորված ժողովուրդ ենք: Այդ արժեքների պահպանումը թույլ տվեց, որ Հայաստանը հազարամյակների խորքից հասնի մեր օրեր։ Այդ ամենի ջահակիրը Հայ Առաքելական Եկեղեցին, որն ազգային է։ 

 

Հայի ինքնությունը և Եկեղեցին

 

-Եկեղեցին ոչ միայն Աստծո խոսքը տարածողն է, այլև լծված է քրիստոնեական և ազգային արժեքների պահպանման, փոխանցման գործին: Փորձում է վերականգնել արժեքները ոչ միայն սփյուռքի հայ համայնքներում նաև Հայաստանում: Այն համայնքում, որտեղ չկա հայկական եկեղեցի, համայնքը ձուլվում է: Այդ օրինակը մենք ունենք: Մենք մտածում ենք, որ ապրելով Հայաստանում, ինքնության պահպանման խնդիրներ չենք ունենա, սակայն այսօր նաև մեր հայրենիքում են վտանգված հայկական ավանդույթներն ու արժեքները: Եկեղեցին ցանկանում է, որ հայը ամուր կառչած լինի իր հողին, հավատքին, պահպանի իր կրոնը, սրբությունները, ընտանիքը, ավանդույթները, տոները: 

 

Արժեքներն այսօր…

 

-Այսօր տեսնում ենք, որ Հայաստանում ոտնահարվում են քրիստոնեական ու  ազգային արժեքները, աղճատվում է ընտանիքի մոդելը, նսեմացվում է ընկերության, մարդկային հարաբերությունների, անգամ սիրո գաղափարը։ Այդ ամենի արդյունքում ունենք այս իրավիճակը: Սա փորձված քաղաքականություն է: Հեշտ է կառավարել արժեհամակարգ ու սկզբունքներ չունեցող մարդկանց։ 

 

Առանց արժեքների…

 

-Աստված արարեց մարդուն իր պատկերով ու նմանությամբ: Ասելով պատկեր ու նմանություն՝ նկատի չունենք արտաքինը, այլ ներքին բովանդակությունը։ Մարդիկ չունենալով արժեքներ, դառնում են ուղղակի բանական արարածներ՝ տարբերվելով կենդանիներից միայն նրանով, որ կարող են խոսել ու մտածել: Մարդիկ առանց արժեքների հեշտությամբ ղեկավարվում են, ձուլվում, ջլատվում, վերածվում ամբոխի: Մարդիկ առանց սրբությունների, սկզբունքների դառնում են վտանգավոր։ 

 

Պայքար արժեքների համար

 

-Այսօր մեր արժեհամակարգը պահպանելու միակ միջոցը Եկեղեցու հետ սերտ հարաբերության մեջ  է, Առանց Եկեղեցու չենք կարող պատկերացնել մեր գոյությունը, ինչպես չենք պատկերացնում երեխայի գոյությունը, առանց ընտանիքի: Մարդը պետք է գա եկեղեցի ու զգա, որ հայ քրիստոնյա է, հանգիստ է, խաղաղ է ու պաշտպանված։ Ճանաչելով Հայ Առաքելական Եկեղեցին՝ ճանաչում ես քո ինքնությունը: 

 

Պատրաստեց Անի Ավագյանը