Նավասարդ Սրբազանն օրհնեց մանուկներին
Այս տարի մարտի 24-ին Հայ Առաքելական Սուրբ Եկեղեցին տոնում է Ծաղկազարդը՝ մեր Տեր Հիսուս Քրիստոսի հրաշափառ մուտքը Երուսաղեմ: Տոնի առթիվ բոլոր եկեղեցիներում մատուցվեց բաց խորանով Սուրբ Պատարագ:
Արարատյան Հայրապետական թեմի առաջնորդանիստ Սուրբ Սարգիս եկեղեցում Ծաղկազարդի տոնական Սուրբ Պատարագը մատուցվեց առաջնորդական փոխանորդ Գերաշնորհ Տեր Նավասարդ արքեպիսկոպոս Կճոյանի հանդիսապետությամբ: Պատարագիչն արժանապատիվ Տեր Անուշավան քահանա Կոշեցյանն էր:
Ն.Ս.Օ.Տ.Տ. Գարեգին երկրորդ Ամենայն Հայոց Կաթողիկոսի բարձր տնօրինությամբ Ծաղկազարդը հռչակված է Մանուկների օրհնության օր։
Հավարտ Սուրբ Պատարագի Նավասարդ Սրբազանը կատարեց Մանուկների օրհնության կարգ: Շնորհավորելով Ծաղկազարդի տոնի առթիվ՝ Սրբազան հայրը սերն ու օրհնությունը փոխանցեց մանուկներին և մաղթեց, որպեսզի զորանան Տիրոջ կամքով ու Սուրբ Հոգու շնորհներով։
Ապա Նավասարդ Սրբազանը Պահպանիչ աղոթքով արձակեց ներկաներին։
Ծաղկազարդից սկսվում է Տիրոջ երկրային կյանքի վերջին՝ Ավագ շաբաթը, որի բոլոր օրերն ունեն իրենց խորհուրդները։
Արարատյան Հայրապետական թեմի տեղեկատվական բաժին
- 2024-03-24